Lehenengo Eguena

GORESPENAK

Agurra

V/. Zatozkit lagun, ene Jainko.
R/. Jauna, zatoz laster ni laguntzera.

V/. Aintza Aitari eta Semeari eta Espiritu Santuari.
      Hasieran zen bezala orain eta beti
      gizaldi eta gizaldietan. Amen. Aleluia.

Goratzarrea

1 Ant. Izartu zaiteze, salterio eta kitara; izartuazoko dot artizarra.

56. salmoa

 Erruki zakidaz, ene Jainko, erruki zakidaz,
        nire anima hau Zeugana dator-eta ihesi;
        zure hegoen gerizpean gordetzen naz,
        ekatxa igaro artean.

Oihu dagiot Goi-goiko Jainkoari,
        on egiten deustan Jainkoari.
        Bialdu beist zerutik salbamena,
        aurretik narabilenak lotsaz bete daizala,
        bere grazia ta leialtasuna bialdu daizala Jainkoak.

Lehoien erdian natza: irrikaz irunsten dabe gizakia;
        horreen hortzak gezi eta lantza,
        horreen mihina ezpata zorrotza.

Jainko, agertu zaitez garai zeruan,
        zabaldu bedi lur osoan zure edertasuna.
        Sarea zabaldu deutsee nire oinei, han jausi nadin ni;
        eurak jausi dira egin deusten zulora.

Bizkor daukat bihotza, bizkor, ene Jainko,
        eresi eta goratzarre deutsut egingo
        «Izartu zakidaz, barrena,
        izartu zaiteze, salterio eta kitara,
        izartuazoko dot artizarra».

Goretsiko zaitut, Jauna, herrietan,
        goratzarre egingo deutsut atzerrietan.
        Handia da-eta zure maitasuna zeruetaraino,
        zure leialtasuna hodeietaraino.

Jainko, agertu zaitez garai zeruan,
        zabaldu bedi lur osoan zure edertasuna.

Aintza Aitari eta Semeari,
        eta Espiritu Santuari.
        Lehen lez, orain eta beti,
        eta amaibako egunetan. Amen.

Ant. Izartu zaiteze, salterio eta kitara; izartuazoko dot artizarra.

2 Ant. Nire herria neure ondasunez asetuko da —dino Jaunak.

Kantika: Jr 31, 10-14

 Entzun Jaunaren hitza, atzerriak,
        iragarri urruneko ugarteetan:
        «Israel banatu ebanak batuko dau,
        artzainak artaldea lez zainduko dau.
        Jakob Jainkoak ber-erosi dau-eta
        indartsuago baten eskutik atara dau».

Irrintzika etorriko dira Sion-mendira,
        Jaunaren ondasunetara batuko dira:
        Ogi, ardau eta oriotara, artalde ta behi-taldeetara.
        Eta hareen bihotza baratza busti bat lez izango da,
        ez dira gaurtik aurrera makalduko.

Neskek orduan pozik jardungo dabe dantzan,
        mutil eta agureekin batera.
        Negarretik atarako ditut pozaldira,
        eta atsekabe ondoren, atseden eta alaitasunera.
        Abadeen bihotza hordituko dot guritasunez,
        eta nire herria asetuko da nire ondasunez.

Aintza Aitari eta Semeari,
        eta Espiritu Santuari.
        Lehen lez, orain eta beti,
        eta amaibako egunetan. Amen.

2 Ant. Nire herria neure ondasunez asetuko da —dino Jaunak.

 

3. Ant. Handia da Jauna, guztiz goresgarria, gure Jainkoaren urian. †

 Sal 47

 Handia da Jauna, guztiz goresgarria,
        gure Jainkoaren urian.
†      Haren mendi santua, muno argitsu,
        lurbira osoaren pozgarri;

Sion-mendia ipar-mugan,
        errege handiaren uri.
        Hango jauregietan Jainkoa,
        gaztelu sendo agertu da.

Hain zuzen, erregeak ziran alkartu,
        danak batean Haren aurka oldartu.
        Baina ikusiaz bat izutu ziran,
        lotsaz igeska joan ziran.

Bertan hartu ebazan dardareak,
        erdi-minaren erara;
        eguzki-haizea danean,
        Tarsisko itsas-ontziak apurtzen dauzan eran.

Entzun bezela dogu ikusia
        gudari-taldeen Jaunaren urian,
        gure Jainkoaren urian:
        Jainkoak sendotzen dau beti guztian.

Gogoratzen dogu, Jainko, zure maitasuna,
        zure jauretxe-erdian.
        Zure izena lez, Jainko, zure gorespena,
        heltzen da lurraren bazterrera:
        zure eskoia zuzentasunez dago betea.

Poztutzen da Sion-mendia,
        poztutzen dira Judako uriak, zure erabagiaz.

Egin itzul-bira Sionen inguruan,
        bat-banatu hango torreak.
        Ikusi hango harresiak, begira hango gazteluak,
        ondorengoei esateko:

«Honenbestekoa da Jainkoa,
        gure Jainkoa betiren betieran,
        Bera dogu gidari gizaldi guztietan».

Aintza Aitari eta Semeari,
        eta Espiritu Santuari.
        Lehen lez, orain eta beti,
        eta amaibako egunetan. Amen.

Ant. Handia da Jauna, guztiz goresgarria, gure Jainkoaren urian.

 

Jainkoaren hitza

        Hauxe dino Jaunak: Zerua dot jesarleku, eta lurra nire oin-azpiko. Zer etxe eregi daikedazue Niri? Zer atseden-leku? Diran gauza guztiak neure eskuak egin ditu, neureak dira danak —dino Jaunak—. Nire begiak apalagana eta bihotz-urratuagana doaz: nire berbeari buruz ikaratzen danagana.

R/. Oihuka dihardut bihotz guztiaz: * Entzun naizu, Jauna. Oihuka.
V/. Beteko dodaz Zuk jarriak. Entzun.
R/. Aintza Aitari. Oihuka.

Bened. ant. Izan gaitezan Jaunaren zerbitzari zintzo, eta atarako gaitu arerioen eskutik.

Bedeinkatua Jauna, Israelgo Jainkoa
    agertu eta bere herria askatu dauana;
    salbazino indarra deusku emon,
    bere morroi Dabiden etxean.

Halan eukan berbea emonda bere santuen bidez,
    behinola bere profeta ebazanen bidez;
    salbazinoa gure arerioen menpetik,
    gorroto deuskuen guztien eskutik.

Horrela egin deutse gure gurasoei erruki,
    bere alkarte santuaz oroiturik;
    egin eutson-eta  gure guraso Abrahami zin-hitza,
    Berak emongo euskula.

Gure etsaien eskutik gu atarata, bildur barik,
    izan gaitezan Haren zerbitzari;
    zintzo eta zuzen Beraren aurrean,
    gure egun guztietan.

Zu, barriz, seina,
    Goi-goikoaren profeta deitua izango zara,
    Jaunaren aurpegi aurretik joango zara-eta,
    Hari bidea prestatzera;
    erakustearren Haren herriari salbamena,
    euren pekatuen parkamena.

Gure Jainkoaren errai errukitsuakaitik,
    agertuko jaku Goiz-eguzkia ganetatik;
    ilunpetan eta herio-gerizpean dagozanei argi egitera,
    gure oinok bake-bidean zuzentzera.

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen. 

Ant. Izan gaitezan Jaunaren zerbitzari zintzo, eta atarako gaitu arerioen eskutik.

 

Eskariak

        Eskerrak emon deioguzan, egun barriaren argia emon deuskun Kristori, esanez:

Bedeinkatu gaizuz, Jauna, eta santu egin.

        —Zeure burua, gure pekatuekaitik opari eskeini zendun Horrek, * hartu gaurko gure egintzak eta lanak.

        —Gure begiak, egun barriaren argiz alaitzen dozuzan Hori, * izan zaitez gure bihotzen argi bizi.

        —Egizu, Jauna, izan gaitezala bihotz handiko eta esku-zabal gure ingurukoakaz, * horrela zeure antzeko izan gaitezan.

        —Goiz-goizetik ikusi daigula zure errukia, * eta zure pozak indartu gaizala egun guztian.

(… isil unea, bakotxak bere eskaria egin ahal izan daian).

        Salbatzaileak agindu eta irakatsi euskun lez, uste onez esan daigun: 

 Gure Aita zeruetan zarana,
santu izan bedi zure izena,
etor bedi zure erreinua,
egin bedi zure nahia
zeruan bezela lurrean ere.
Emoiguzu gaur
egun honetako ogia,
parkatu gure zorrak
geuk ere geure zordunei
parkatzen deutsegun ezkero,
ez eiguzu itzi tentazinoan jausten
baina atara gagizuz gatxetik.

Otoitza

        Jainko guztiz ahaltsu eta betikoa, goiz, eguerdi eta arratsalde, eskean gaukazuz: kendu gugandik pekatuaren iluna, eta emon eguneko argia dan Kristo. Zurekin eta Espiritu Santuarekin batean Jainko eta errege bizi da-ta, gizaldi eta gizaldietan.

 

Amaierea

V/. Bedeinkatu gaizala Jainko ahalguztidunak: Aitak eta Semeak eta Espiritu Santuak.
R/. Amen.

V/. Goazen Jaunaren bakean.
R/. Eskerrak Jainkoari.