Lehenengo Astelehena

GORESPENAK

Agurra

V/. Zatozkit lagun, ene Jainko.
R/. Jauna, zatoz laster ni laguntzera. 

V/. Aintza Aitari eta Semeari eta Espiritu Santuari.
      Hasieran zen bezala orain eta beti
      gizaldi eta gizaldietan. Amen. Aleluia. 

 

Goratzarrea

 

Salmoak

5. salmoa, 2-10. 12-13

1 Ant. Zuri arrenka nagokizu, Jauna, entzun goizetik nire berbaldia.

Entzun, Jauna, nire eskaria,
    aditu eizu nire intziria.
    Zagoz erne nire deadar-hotsera,
    ene Errege ta ene Jainko. 

Zuri arrenka nagokizu, Jauna,
    entzun goizetik nire berbaldia;
    goizean agertzen deutsut nire eskaria,
    eta zure zain gelditzen naz. 

Ez zara-ta Jainko gaiztakeria-zale,
    gaiztorik ezin da bizi zurean,
    harroek ez dabe iraungo zure aurrean. 

Gaizkile guztiak gorroto dituzu,
   guzur-ontziak hondatzen dituzu.
   Gizon odol-zale ta maltzurrak,
   gorroto ditu Jaunak. 

Ni, barriz, zure maitasun ugariz,
    sartuko naz zurean;
    zure jauretxe deunaren aurrean
    ahuspez jarriko zure bildurrean. 

Jauna, nire etsaiekaitik,
    zure zuzentasunean eroan nagizu,
    nire aurrean zure bidea zelaitu eizu. 

Ez da-ta egiarik holakoen ahotan,
    horreen bihotzak txarkeria dau asmotan;
    hilobi zabaldua da horreen eztarria,
    horreen mihina, zurikeria. 

Zugana batzen diranak, ordea, poztu bediz,
    egin beie oihu beti pozaren pozez.
    Babestu eizuz, eta alaitu bediz zuregan
    zure izena maite dabenak. 

Zintzoa zeuk onesten dozu-ta, Jauna,
    onginahiez inguratzen babeskiz bezela. 

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

 Ant. Zuri arrenka nagokizu, Jauna, entzun goizetik nire berbaldia.

 

2 Ant. Goresten dogu, gure Jainko, zure izen argitsua. 

Kantika: 1 Kro 29, 10-13

 Gora zu, Jauna, gure aita Israelen Jainko,
    betirik betiko. 

Zeureak dira, Jauna, indarra ta handitasuna,
    zeureak argia, distira ta argitasuna.
    Zeru-lurretan dagozan guztiak zure dira,
    zeureak, Jauna, erreinua,
    eta zu, guztien ganetik dagoan buruzagia. 

Ondasuna ta ospea zeure dituzu,
    guztietan zeuk agintzen dozu.
    Zure eskuan indarra ta kemena,
    guztia handi ta sendo egitea, zeure eskuarena. 

Orain, beraz, gure Jainko, ospatzen zaitugu,
    zure izen argitsua goresten dogu. 

Aintza Aitari eta Semeari,
    eta Espiritu Santuari.
    Lehen lez orain eta beti
    eta amaibako egunetan. Amen. 

Ant. Goresten dogu, gure Jainko, zure izen argitsua.

 

3 Ant. Jauretsi Jauna apainduria deunez. 

28. Salmoa

 Emon, Jainko-seme-alabok, Jaunari,
    emon ospe eta indar Jaunari.
    Emon ospe Jaunari bere izenaren ederrez,
    jauretsi Jauna apainduria deunez. 

Horra Jaunaren berbaroa ur-gainean:
    Jainko itzalgarriaren ostotsa durundan,
    Jauna ur ugarien ganean.
    Jaunaren berbaroa indartsu,
    Jaunaren berbaroa ospetsu. 

Jaunaren berbaroak ditu izaiak apurtzen,
    Libango izaiak Jaunak apurtzen.
    Libani jauzi eragingo deutso, zekorrari lez;
    Sarioni, basa-idiskoari lez. 

Jaunaren berbaroak su-garra dau botatzen,
    Jaunaren berbaroak basamortua ikaratzen,
    Jaunak Kades-lekaroa ikaratzen.
    Jaunaren berbaroak bihurritzen ditu arteak,
    soiltzen basoak,
    haren jauretxean danek dinoe: Gora! 

Jesarri da uholde-ganean,
    Jauna errege jesarriko betiraunean.
    Bere herriari indar emongo deutso Jaunak,
    bere herria bedeinkatuko dau bake emonez Jaunak. 

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen. 

 Ant. Jauretsi Jauna apainduria deunez.

 

Jainkoaren Hitza

        Lanik egin nahi ez dauanak, ez daiala jan. Entzun dogu-ta, zuen artean batzuk alperkerian bizi dirala, ezer egin barik, non zer jakingo, barriketan. Holakoei agintzen eta eskatzen deutsegu Jesu Kristo Jaunaren izenean, bakean lan egin daiela, euren ogia irabazteko. Zuek, barriz, senideok, ez aspertu on egiten.

R/. Bedeinkatua Jauna * betiren beti. Bedeinkatua.
V/. Mirariak egiten bakarra. Betiren.
R/. Aintza. Bedeinkatua.

 

Bend. ant. Bedeinkatua Jauna, gure Jainkoa.
 

Bedeinkatua Jauna, Israelgo Jainkoa
    agertu eta bere herria askatu dauana;
    salbazino indarra deusku emon,
    bere morroi Dabiden etxean. 

Halan hitz emona eban-eta bere santuen bidez,
    behinola bere profeta zituenen bidez;
    salbazinoa gure etsaien menpetik,
    gorroto deuskuen guztien eskutik. 

Horrela egin deutse gure gurasoei erruki,
    bere alkarte santuaz oroiturik;
    egin eutson-eta  gure guraso Abrahami zin-hitza,
    Berak emongo euskula. 

Gure etsaien eskutik gu atarata, bildur barik,
    izan gaitezan Haren zerbitzari;
    zintzo eta zuzen Beraren aurrean,
    gure egun guztietan. 

Zu, barriz, seina,
    Goi-goikoaren profeta deitua izango zara,
    Jaunaren aurpegi aurretik joango zara-eta,
    Hari bidea prestatzera;
    erakustearren Haren herriari salbamena,
    euren pekatuen parkamena. 

Gure Jainkoaren errai errukitsuekaitik,
    agertuko jaku Goiz-eguzkia ganetatik;
    ilunpetan eta herio-gerizpean dagozanei argi egitera,
    gure oinok bake-bidean zuzentzera. 

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant. Bedeinkatua Jauna, gure Jainkoa.

 

Eskariak

        Goretsi daigun Kristo, graziaz eta Espiritu Santuaz betea, eta uste osoz eskatu deiogun:

Emoiguzu, Jauna, zeure Espiritua.

        —Emoiguzu egun gozo, baketsu eta errubakoa, * arratsaldea heltzean, pozez eta  bihotz garbiz goretsi zaiguzan.

        —Agertu eiguzu, zure betiko bihotz ona, * eta zuzendu eizuz gure eginkizunak.

        —Erakutsi eiguzu, Jauna, zure aurpegi argia, eta emoiguzu zure bakea, * sentitu daigun gaur egun guztian, zure eskuaren laguntza.

        —Begitu onez, Jauna, gure otoitzetan euren uste ona jarri dabenei, * eta emoiezuz gorputz-arimetako on guztiak.

(… isil unea, bakotxak bere eskaria egin ahal izan daian)

        Amaitu daiguzan gure eskariak, Jaunak irakatsi euskun otoitza esanez:

        Gure Aita zeruetan zarana,
        santu izan bedi zure izena,
        etor bedi zure erreinua,
        egin bedi zure nahia
        zeruan bezela lurrean ere.
        Emoiguzu gaur
        egun honetako ogia,
        parkatu gure zorrak
        geuk ere geure zordunei
        parkatzen deutsegun ezkero,
        ez eiguzu itzi tentazinoan jausten
        baina atara gagizuz gatxetik.

 

Otoitza

       Zure graziak, Jauna, eragin eta lagundu beiz gure eginak, gure lan guztia Zeugandik sortu daiten, eta Zeugana jo daian. Zure Seme Jesu Kristo gure Jaunaren bitartez, Zurekin eta Espiritu Santuarekin batean Jainko eta errege bizi da-ta gizaldi eta gizadietan.

 

Amaierea

V/. Jaunak bedeinkatu gaizala, eta gatx guztietatik zaindurik, eroan gaizala betiko bizitzara.

R/. Amen.

V/. Goazen Jaunaren bakean.
R/. Eskerrak Jainkoari.