Gorespenak

IV. DOMEKEA

GORESPENAK

Agurra

V/. Zatozkit lagun, ene Jainko.
R/. Jauna, zatoz laster ni laguntzera.

V/. Aintza Aitari eta Semeari eta Espiritu Santuari.
Hasieran zen bezala orain eta beti
gizaldi eta gizaldietan. Amen. Aleluia.

Goratzarrea

1 Ant. Eskerrak Jaunari, Haren maitasuna betikoa da-ta, alleluia.

117 Salmoa

Eskerrak Jaunari, ona da-ta,
    Haren maitasuna betikoa da-ta.
    Israel-etxeak hauxe esan bei:
    «Haren maitasuna betikoa».

Aaron-etxeak hauxe esan bei:
    «Haren maitasuna betikoa».
    Esan beie Jaunaren bildur diranek:
    «Haren maitasuna betikoa».

Deitu neuntsan larrialdian Jaunari,
    entzun eustan eta onez atara.
    Jauna dot neugaz: ez deutsat bildurrik,
    gizonak egin leikidanari.
    Nigaz Jauna, niri lagun egiteko,
    nik etsaiak lotsatuak ikusteko.

Hobe da Jaunagana batzea,
    eta ez gizakiengan uste on izatea;
    hobe da Jaunagana batzea,
    eta ez handikiengan uste on izatea.

Atzerri-jende guztiek inguratu ninduen:
    Jaunaren izenean xehatu nebazan.
    Alde guztitik jendeek inguratu ninduen:
    Jaunaren izenean xehatu nebazan.
    Erleek lez inguratu ninduen,
    biztu ziran sua sasian lez:
    Jaunaren izenean xehatu nebazan.

Gogor bultzatu ninduen jausteko,
    hantxe egoan Jauna niri laguntzeko.
    Nire indar eta nire kemen Jauna,
    Bera suertatu da nire salbazinoa.

Poz eta garaipen-oihuak zintzoen txabolan:
    «Jaunaren eskoiak bizkor jokatu dau,
    Jaunaren eskoiak nau altxatu,
    Jaunaren eskoiak bizkor dau jokatu».

Ez naz hilgo, bizi izan baino,
    Jaunaren eginak nik oihukatuko.
    Zigortu nau Jaunak, zigortu,
    baina ez nau heriotzaratu.

Edegi niri zintzotasunaren ateak,
    hortik sarturik emon deiodazan Jaunari eskerrak.
    Hauxe da Jaunaren atea,
    zintzoak sartuko dira aurrera.

Eskerrak Zuri, entzun nozulako,
salbazino suertatu zaiatazalako.

Etxegileek baztertutako harria,
    berori suertatu da giltz-harria.
    Jaunak egin dau hori,
    gure begien harrigarri.

Hauxe da Jaunak egin dauan eguna,
    gu poztutzeko eta alaitzeko eguna.
    Emon, Jauna, salbazinoa,
    emon, Jauna, zoriona.

Bedeinkatua Jaunaren izenean datorrena,
    bedeinkatzen zaituegu Jaunaren etxean.
    Jainkoa da Jauna,
    guri argi egin deuskuna.

Antolatu eizue jente-lerroa
abar-hostoak eskuetan dabezala,
altarearen ertzetaraino doazala.

Zeu zara nire Jainko,
eskerrak emoten deutsudaz;
ene Jainko, goresten zaitut.

Eskerrak Jaunari, ona da-ta,
Haren maitasuna betikoa da-ta.

Aintza Aitari eta Semeari
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant. Eskerrak Jaunari, Haren maitasuna betikoa da-ta, alleluia.

2 Ant. Alleluia, Jaunak egindako guztiak, bedeinkatu eizue Jauna.

Kantika: Dn 3, 52-57

Bedeinkatua Zu, Jauna, gure arbasoen Jainkoa:
aintza ta gorespen Zuri gizaldietan.

Bedeinkatua zure izen santu eta aintzagarria:
aintza ta gorespen Berari gizaldietan.

Bedeinkatua Zu, jauretxe santu eta aintzagarrian:
aintza ta gorespen Zuri gizaldietan.

Bedeinkatua Zu, zure erreinuko aurkian:
aintza ta gorespen Zuri gizaldietan.

Bedeinkatua Zu, kerubin-gainean jesarrita,
lezak ikusten dozuzana:
aintza ta gorespen Zuri gizaldietan.

Bedeinkatua Zu, zeru-sabaian:
aintza ta gorespen Zuri gizaldietan.

Jaunak egindako guztiak, bedeinkatu eizue Jauna:
goretsi eta ospatu gizaldietan.

Aintza Aitari eta Semeari,
     eta Espiritu santuari.
     Lehen lez, orain eta beti,
     eta amaibako egunetan. Amen.

Ant. Alleluia, Jaunak egindako guztiak, bedeinkatu eizue Jauna.

3 Ant. Arnasa dauan guztik Jauna bei goretsi, alleluia.

150 Salmoa

Goretsi eizue Jauna bere jauretxean,
    Goretsi eizue bere zeru ospetsuan.
    Goretsi eizue, Berak egin-lan handiakaitik,
    Goretsi eizue bere handiaren handiagaitik.

Goretsi eizue turutaren hotsez,
    Goretsi eizue salterioz eta kitar-hotsez.
    Goretsi eizue zaldabai eta dantzarekin,
    Goretsi eizue zurda-soinu eta txistuarekin.

Goretsi eizue txilin ozenekin,
Goretsi eizue txilin alaiekin.
Arnasa duen guztik Jauna beza goretsi.

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant. Arnasa dauan guztik Jauna bei goretsi, alleluia.

Jainkoaren hitza

Jdt 8, 21b-23

Gogoratu eizu Jesu Kristo Jauna, Dabiden odolekoa, hilen artetik biztua. Benetako hitza: Haregaz hiltzen bagara, bizi ere, Beragaz bizi izango gara; nekeetan irauten badogu, errege ere izango gara Haregaz; ukatzen badogu, Harek ere ukatu egingo gaitu; gu leialak ez bagara, Ha beti izango da leial; ezin dau-ta bere burua ukatu.

R/. Ospatzen zaitugu, Jauna, ospatzen, * zure izena dogu zabaltzen. Ospatzen.
V/. Zure mirariak adierazten. Zure.
Aintza Aitari. Ospatzen.

Bened. ant. (Domekakoa)

Bedeinkatua Jauna, Israelgo Jainkoa
    agertu eta bere herria askatu dauana;
    salbazino indarra deusku emon,
    bere morroi Dabiden etxean.

Halan eukan berbea emonda bere santuen bidez,
    behinola bere profeta zituenen bidez;
    salbazinoa gure etsaien menpetik,
    gorroto deuskuen guztien eskutik.

Horrela egin deutse gure gurasoei erruki,
    bere alkarte santuaz oroiturik;
    egin eutson-eta gure guraso Abrahami zin-hitza,
    Berak emongo euskula.

Gure etsaien eskutik gu atarata, bildur barik,
    izan gaitezan Haren zerbitzari;
    zintzo eta zuzen Beraren aurrean,
    gure egun guztietan.

Zu, barriz, seina,
    Goi-goikoaren profeta deitua izango zara,
    Jaunaren aurpegi aurretik joango zara-eta,
    Hari bidea prestatzera;
    erakustearren Haren herriari salbamena,
    euren pekatuen parkamena.

Gure Jainkoaren errai errukitsuekaitik,
    agertuko jaku Goiz-eguzkia ganetatik;
    ilunpetan eta herio-gerizpean dagozanei argi egitera,
    gure oinok bake-bidean zuzentzera.

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant. (Domekakoa)

Eskariak
Jainko ahalguztidunak maite gaitu, eta badaki zer behar dogun; otoitz deiogun, ba, esanez:

Gora Zu; Zeugan dogu uste ona.

—Bedeinkatua Zu, Jainko guztiz ahaltsu, zeru-lurren errege, bihurri eta pekatari garanok egiaren argitara deitu gaituzulako; * egizu, santu eta zuzen zerbidu zaiguzala.

—Zure errukiaren atea zabaldu deuskuzun Jauna, * egizu, behin be ez gaitezala aldendu bizira daroan bidetik.

—Egizu, gaur zure Seme guztiz maitearen biztuerea ospatzen dogunok, * egun hau bihotz alaiz igaro daigula.

—Emon, Jauna, zure fededunoi, otoitzerako eta gorespenerako gogoa, * non-nahi eta beti Zuri eskerrak emon deizuguzan.

(… isil unea, bakotxak bere eskaria egin ahal izan daian).

Kristo berbiztuaren Espirituak eraginik, hurreratu gaitezan orain guztiok Jainkoagana, Haren egiazko seme-alaba gara-ta, eta esan deiogun:

Gure Aita zeruetan zarana,
santu izan bedi zure izena,
etor bedi zure erreinua,
egin bedi zure nahia
zeruan bezela lurrean ere.
Emoiguzu gaur
egun honetako ogia,
parkatu gure zorrak
geuk ere geure zordunei
parkatzen deutsegun ezkero,
ez eiguzu itzi tentazinoan jausten
baina atara gagizuz gatxetik.

Otoitza (Domekakoa)

Amaierea

V/. Bedeinkatu gaizala Jainko ahalguztidunak: Aitak eta Semeak eta Espiritu Santuak.
R/. Amen.

V/. Goazen Jaunaren bakean.
R/. Eskerrak Jainkoari.

IV. ASTELEHENA

GORESPENAK

Agurra

V/. Zatozkit lagun, ene Jainko.
R/. Jauna, zatoz laster ni laguntzera.

V/. Aintza Aitari eta Semeari eta Espiritu Santuari.
Hasieran zen bezala orain eta beti
gizaldi eta gizaldietan. Amen. Aleluia.

Goratzarrea

Salterioa

1 Ant. Zeure maitasunaz, Jauna, asetu gaizuz goizean.

89 Salmoa

Jauna, gure igesleku Zeu izan zara,
gizalditik gizaldira.

Mendiak erne baino lehen,
     lurbirea sortu baino lehenago,
     bazara Zu Jainko,
     betirik eta betiko.

Hauts bihurtuazoten dozuz gizakiak, hauxe esanez:
     «Bihurtu zaiteze gizaseme-alabok».
     Zure begientzat mila urte,
     atzo igaro zan eguna haina,
     gau-txanda bat haina.

Amets gauzatzen dira Zuk eroatean,
     goizeko bedar eze antzean:
     goizean ezerik da garatzen,
     arratsaldean zimeltzen da eta igartzen.

Zure hasarreaz lur jota dagoz-eta,
     zure suminaz, izuturik.
     Begi-aurrean ipini dituzu gure pekatuak,
     zure aurpegiaren argitan gure txarkeria ezkutuak.

Gure egun guztiak
zure hasarretan igaro jakuz,
gure urteak intziri baten amaitu jakuz.

Gure egun guztiak hirurogei ta hamar urte,
     bizkor izanean, laurogei urte,
     eta gehienak neke ta huskeria,
     berehala doaz-eta, gu hegaz goaz.

Nork ezagutu dau zure hasarrearen indarra?
nork zure sumina, zor jatzun ikaraz?

Gure egunak bat-banatzen erakutsi eiguzu,
     bihurtu dakigula bihotz hau zuhur.
     Bihurtu zakiguz, Jauna; noiz arte?
     Jarri zaitez zure morroien alde.

Zure maitasunaz asetu gaizuz goizean,
gure egun guztietan
poztu eta alaitu gaitezan.

Poztu gaizuz, goibeldu gaituzun egunen ordez
ikusi doguzan gatx-urteen ordez.

Zure lana agertu bedi zure morroiengan,
eta zure aintza zure seme-alabengan.

Geugana bedi Jaunaren,
     gure Jainkoaren ontasuna,
     gure esku-lanean lagundu gaizuz,
     eta gure eskuen lana lagundu eizu!

Aintza Aitari eta Semeari
     eta Espiritu Santuari.
     Lehen lez, orain eta beti,
     eta amaibako egunetan. Amen.

Ant. Zure maitasunaz, Jauna, asetu gaizuz goizean.

2 Ant. Lur-bazterretik Jaunaren ospea.

Kantika: Is 42, 10-16

Kanta Jaunari kantu barri,
     Haren gorespena lurraren bazterreraino heldu bedi.
     Ekin orroka itsaso eta itsas-barren,
     ugarte eta hango biztanle.

Alaitu bediz basamortu eta hango uriak
     Kedar-zelaietan bizi diranak.
     Petratarrak, oihuka ekin,
     mendi-ganean irrintzi egin.
     Jaunaren aintza abestu beie,
     ugarteetan emon beioe ospe.

Badoa Jauna indartsu bat lez,
     sutan doa gudari bat lez.
     Irrintzia bota oihu-oihuka
     eta badoa ausarta etsaiaren aurka.

Isilik egon naz aspaldi honetan,
     berba barik dot dana jasan.
     Umegina lez dihardut garrasika,
     ito-zorian arnas-estuka.

Idortuko ditut mendi eta mendixkak,
     igartuko bedarrak,
     lehortuko ditut ibaiak,
     txukatuko aintzirak.

Gidatuko ditut itsuak bide harrotzetan,
     eta eroango bidezidor ez-ezagunetan.
     Argi bihurtuko deutset iluna,
     eta zelai, malkarrak.

Aintza Aitari eta Semeari
     eta Espiritu Santuari.
     Lehen lez, orain eta beti,
     eta maibako egunetan. Amen.

Ant. Lur-bazterretik Jaunaren ospea.

3 Ant. Goretsi eizue Jaunaren izena, Jaunaren etxean zagozenok.

134a Salmoa

Goretsi eizue Jaunaren izena,
     goretsi ha, Jaunaren mirabeak.
     Jaunaren etxean zagozenok,
     Jaunaren, gure Jainkoaren, atarietan zagozenok.

Goretsi eizue Jauna ona dalako,
     eresi eiozue Haren izenari gozoa dalako.
     Jakob hautatu dau-ta Jaunak beretzat,
     Israel bere ondaretzat.

Badakit handi dana Jauna,
     jainko guztien aldean nagusi gure Jauna.
     Nahi dauan guztia egin dau Jaunak zeru-lurretan,
     itsasoan eta ur-sakon guztietan.

Hodeiak lurraren bazterretatik ekartzen dauz,
tximistez euria ekartzen dau,
haizea bere txokoetatik ataratzen dau.

Jo ditu Egiptoko lehen seme-alabak,
     gizaki eta abereak.
     Mirari eta ikusgarriak egin ditu, Egipto, zure erdian,
     Faraonen eta haren morroi guztien kaltetan.

Atzerri ugari jo ditu, errege bizkorrak hil ditu:
     Sijon, amortarrena, eta Og, basandarrena,
     Kanaango errege danak.
     Hareen lurra emon deutso ondaretzat,
     bere herri Israeli ondaretzat.

Aintza Aitari eta Semeari
     eta Espiritu Santuari.
     Lehen lez, orain eta beti,
     eta amaibako egunetan. Amen.

Ant. Goretsi eizue Jaunaren izena, Jaunaren etxean zagozenok.

Jainkoaren hitza

Jdt 8, 21b-23

Gogoratu eizue, gure gurasoak aztertuak izan zirala, euren Jainkoa egiatan gurtzen ete eben ikusteko. Gogoratu eizue, Abrahan gure aita aztertua izan zala; eta estualdi asko jasan ondoren, Jainkoaren adiskide egin zala. Holan baita Isaak, Jakob, Moises eta Jainkoari atsegin izan jakozan guztiek ere, estualdi askoren artean jarraitu eutsoen zintzotasunez.

R/. Poztu zaiteze, zintzook, Jaunagan, * zuzenak direnei dagokie Ha gorestea. Poztu.
V/. Kanta eiozue kantu barri. Zuzenak.
Aintza Aitari. Poztu

Bened. ant. Bedeinkatua Jauna, Israelgo Jainkoa, agertu eta askatu gaituana.

Ant. Bedeinkatua Jauna, Israelgo Jainkoa, agertu eta askatu gaituana.

Eskariak
Kristok entzuten eta salbatzen ditu Beragana hurreratzen diranak; hurreratu gaitezan, ba, Harengana, ezanez:

Gora Zu; Zeugan dogu uste ona.

—Eskerrak zuri, errukian aberats zaran Horri, * hainbeste maite gaituzulako.

—Munduan beti Aitarekin diharduzun Horrek, barritu eizuz gauza guztiak, * zeure Espiritu Santuaren indarrez.

—Argitu eizuz, Jauna, gure begiak eta gure senideenak, * gaur zure harrigarriak ikusi daiguzan.

—Gaur zure zerbitzura deitzen gaituzun Horrek, * egizu, gure senideen onerako erabili daiguzala zure grazia ugariak.

(… isil unea, bakotxak bere eskaria egin ahal izan daian).

Jesu Kristok irakatsiari jarraituz, hurreratu gaitezan Jainko Aitagana:

Gure Aita zeruetan zarana,
santu izan bedi zure izena,
etor bedi zure erreinua
egin bedi zure nahia
zeruan bezela lurrean ere.
Emoiguzu gaur
egun honetako ogia,
parkatu gure zorrak
geuk ere geure zordunei
parkatzen deutsegun ezkero,
ez eiguzu itzi tentazinoan jausten
baina atara gagizuz gatxetik.

Otoitza
Jauna, Zeuk emon zeuntsan gizakiari lurra, zaindu eian eta landu, eta eguzkia sortu zenduan, berari lagundu eion; egizu, egun honetan zure argiarekin lan egin daigula zure aintzarako eta lagun-hurkoaren onerako. Zure Seme Jesu Kristo gure Jaunaren bitartez, Zurekin eta Espiritu Santuarekin batean Jainko eta errege bizi da-ta, gizaldi eta gizaldietan.

IV. MARTITZENA

GORESPENAK

Agurra

V/. Zatozkit lagun, ene Jainko.
R/. Jauna, zatoz laster ni laguntzera.

V/. Aintza Aitari eta Semeari eta Espiritu Santuari.
Hasieran zen bezala orain eta beti
gizaldi eta gizaldietan. Amen. Aleluia.

Goratzarrea

Salterioa

1 Ant. Zeuri abestuko deutsut salterioz, Jauna, eta hartuko dot biderik zuzenena.

100 Salmoa

Nire kanta-gai maitasuna ta zuzentasuna,
     Zeuri abestuko deutsut salterioz, Jauna.
     Biderik zuzenena dot hartuko;
     Zu nigana noiz etorriko?

Bihotz errugabez ibiliko naz,
     nire etxe barruan.
     Nire begien aurrean ez dot asmorik
     gaiztakeria egitekorik.

Gaizkileari nik gorroto,
     ez da nigana batuko.
     Bihotz gaiztoa urrun egongo da nigandik,
     ez dot ezagutuko gaizto danik.

Lagun-hurkoa isilpean bezten diharduana,
     haxe da galduko dodana.
     Begi-goi dana eta bihotz-harro,
     nik ez dot jasango.

Nire begiak lurreko zintzoei begira:
     neugaz bizi izango dira;
     bide garbian dabilana,
     haxe nire morrontzan jardungo dauana.

Ez da inor bizi izango nire etxean,
     iruzur eginean.
     Guzurrez diharduana ez da egongo oinen ganean,
     nire begien aurrean.

Lurreko hobendunak goizero galduko ditut,
haizatuko Jaunaren uritik gaizkile guztiak.

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant. Zeuri abestuko deutsut salterioz, Jauna, eta hartuko dot biderik zuzenena.

2 Ant. Zure izen onagaitik! Ez gaizuz zapuztu, Jauna.

Kantika: Dn 3, 26.27.29.34-41

Bedeinkatua Zu, Jauna, gure arbasoen Jainkoa!
Goresgarria eta aintzagarria betiko zure izena!

Egin deuskuzun guztian zuzena zara-ta,
     zure egite guztiak zinak dira.
     Zuzenak dira zure bide guztiak,
     egiazkoak zure epai guztiak.

Bai, pekatu egin dogu, eta oker jokatu,
     Zugandik aldenduz.
     Guztian hutsegin dogu,
     zure aginduak ez ditugu entzun.

Zure izen onagaitik!
     Ez gaizuz betiko zapuztu, Jauna,
     eta ez hausi gugaz dozun ituna.
     Ez ukatu guri zure errukirik,
     Abraham zure maiteagaitik;
     Isaak zure morroiagaitik,
     Israel zure santuagaitik.

Zeuk emon zeuntsen-eta berbea
zeruko izarrak eta itsasoko hondarrak lez,
ugarituko zendula hareen ondorea.

Orain, ordea, Jauna, oso txiki bihurtu gara,
     beste herri guztien aldean;
     hankapetuta gagoz gaur lurbira osoan,
     geure pekatuen ordainetan.

Aldi honetan ez dogu buruzagirik,
     ez profeta, ez gidari, ez erre-oparirik,
     ez opari, ez eskeintza ta ez lurrunik;
     Ez dogu lehen-frutuak Zuri eskeintzeko tokirik,
     ez zure errukia non-aurkiturik.

Horregatik, Jauna, hartu gaizuz onez,
     bihotz-damuz gagoz-eta,  eta gogo apalez;
     hartu gaizuz, ahari eta zezenen erre-opari lez,
     milaka bildots gizen lez.

Halan izan bedi gaur gure oparia zure aurrean,
eta atsegin bekizu guk Zuri jarraitzea,
ez dira-ta lotsatuko Zugan uste on dabenak.

Orain bihotz-bihotzez jarraitzen deutsugu,
     zure bildur gara eta zure aurpegiaren bila gabiltzuz.

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant. Zure izen onagaitik! Ez gaizuz zapuztu, Jauna.

3 Ant. Kantu barri bat kantatuko deutsut, Jauna.

143a Salmoa

Bedeinkatua izan bedi nire harkatx dan Jauna,
     eskuok gudura eta atzamarrok burrukara
     egokitzen deustazana.
     Nire laguntzaile eta nire gaztelu,
     nire salbatzaile eta gordeleku.
     Nire babeski eta batze-leku da-ta,
     herriak menpeko emon deustazana.

Jauna, zer da gizona Zu haretzaz arduratu zaitezan?
     Zer da gizasemea Zu haretzaz oroitu zaitezan?
     Gizona arnasaldi baten antzeko,
     haren egunak, iges doan gerizearen antzeko.

Eratsi eizu ortzia eta jatsi zaitez, Jauna,
     ikutu eizuz mendiak, eta ketan jarriko dira.
     Tximistez jo eta sakabanatu eizuz,
     zure gezia jaurtiz ikaratu eizuz.

Luzatu eidazu eskua goiko ganetik,
     atara naizu eta salbau uholdetik,
     atzerritarren eskutik.
     Guzurra dino-ta hareen ahoak,
     hareen eskoiak guzurrezko zina.

Kantu barri bat kantatuko deutsut, Jainkoa,
     hamar hariko salterioz abestekoa,
     Erregeei garaipena emon deutsezuna,
     Dabid, zure morroia, onik atara dozuna.

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant. Kantu barri bat kantatuko deutsut, Jauna.

Jainkoaren hitza

Is 55, 1

Egarri zarien guztiok, erdu uretara; dirurik ez dozuenok ere bai; etorri, erosi garia eta jan ordaindu barik, ardaua eta esnea hutsean.

R/. Entzun, Jauna, nire oihua; * zeure hitzetan dot itxaropidea. Entzun.
V/. Egun-sentirako banator zure laguntza eskatzera. Zure.
Aintza Aitari. Entzun.

Bened. ant. Gorroto deuskuen guztien eskutik atara gaizuz, Jauna.

Ant. Gorroto deuskuen guztien eskutik atara gaizuz, Jauna.

Eskariak
Jainkoak Berak emoten deusku, egun honen hasieran Bera goresteko poza, holan gure itxaropena barrituz. Dei egin deiogun, ba, esanez:

Zure izenaren aintzarako, entzun gaizuz, Jauna.

—Eskerrak zuri Jesu Kristo gure Salbatzailearen Aita, * zure Semearen bitartez, ezaguera eta hilezkortasuna emon deuskuzuzalako.

—Emoiguzu bihotz apala, alkarren zerbitzari izan gaitezan, * Kristoren bildur santuan.

—Isuri eiguzu zure Espiritua zure zerbitzari garanoi, * alkar maite izan daigun eta gure senidetasuna egiazkoa izan dadin, ez itxurazkoa.

—Zeuk ebatzi dozu, gizakia lanaren bidez izatea munduaren jabe; * egizu gure lana Zu goresteko izan dadila, eta gizakiak salbatzeko.

(… isil unea, bakotxak bere eskaria egin ahal izan daian).

Jainkoak, gugaitik maitekiro arduratuz, bere aita-maitasuna beti agertzen deuskun ezkero, bildur barik esan daigun:

Otoitza
Jauna, handitu eizu gugan sinismena, gure ezpanetako bedeinkapenak betiko bizia izan daian ondorio. Zure Seme Jesu Kristo gure Jaunaren bitartez, Zurekin eta Espiritu Santuarekin batean Jainko eta errege bizi da-ta, gizaldi eta gizaldietan.

Amaierea

V/. Bedeinkatu gaizala Jainko ahalguztidunak: Aitak eta Semeak eta Espiritu Santuak.
R/. Amen.

V/. Goazen Jaunaren bakean.
R/. Eskerrak Jainkoari.

IV. EGUAZTENA

GORESPENAK

Agurra

V/. Zatozkit lagun, ene Jainko.
R/. Jauna, zatoz laster ni laguntzera.

V/. Aintza Aitari eta Semeari eta Espiritu Santuari.
Hasieran zen bezala orain eta beti
gizaldi eta gizaldietan. Amen. Aleluia.

Goratzarrea

Salterioa

1 Ant. Bizkor daukat bihotza, bizkor, ene Jainko. †

107 Salmoa

Bizkor daukat bihotza, bizkor, ene Jainko,
†  eresi eta goratzarre deutsut egingo.
     Izartu zakidaz, barrena,
     izartu zaiteze, salterio eta kitara,
     izartuazoko dot artizarra.

Goretsiko zaitut, Jauna, herrietan,
     goratzarre egingo deutsut atzerrietan.
     Handi da-ta zure maitasuna zeruetaraino,
     zure leialtasuna hodeietaraino.

Jainko, agertu zaitez garai zeruan,
zabaldu bedi lur osoan zure edertasuna.

Zure maiteak onez atara eizuz,
lagundu eiezu eskoiez eta entzun gaizuz.

Holantxe egin dau berba Jainkoak bere jauretxean:
«Siken pozetan dot banatuko,
Sukot-ibarra neurtuko.

Neure lur dot Galaad, neure lur Manases,
Efrain neure buru-oskol da,
neure errege-makila Juda.

Neure garbi-ontzi dot Moab,
Edon-ganean oinetakoa dot jarriko,
Filisteari garaipen-oihu egingo».

Uri sendora nork nenkarke?
Edoneraino nork eroango ninduke?
Ez ete Zeuk, zapuztu gaituzun Jainko horrek,
gure gudari-taldeekin gehiago urteten ez dozun horrek?

Etsaien aurka emoiguzu laguntza,
     ustela da-ta giza-laguntza.
     Jainkoa lagun, gogor dogu jokatuko,
     eta gure etsaiak, Berak ditu zapalduko.

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant. Bizkor daukat bihotza, bizkor, ene Jainko.

2 Ant. Osasun eta garaipen-estalkiz jantzi nau Jaunak.

Kantika: Is 61, 10—62,5

Pozez beterik nauka Jaunak,
     nire arimea Jainkoagaz alai daukat:
     osasun-soinekoz jantzi nau,
     garaipen-estalkiz apaindu;
     Koroia jazten dauan senargaia lez,
     edergailuz apaintzen dan andragaia lez.

Lurrak landarak emoten dauzan lez,
     eta ortuak hazia ernetzen dauan lez:
     halantxe erneazoko dau Jaunak zuzenbidea
     eta gorespena atzerri guztien aurrean.

Sionen maitez ez naz isilduko,
     Jerusalemen maitez ez naz geldi egongo;
     Haren zuzentasuna distira lez argituko dan arte.
     Haren salbamena zuzia lez biztuko dan arte.

Ikusiko dabe herriek zure zuzentasuna,
     erregeek zure ospea;
     Izen barria ipiniko jatzu,
     Jaunaren ahoak emona.

Koroi eder izango zera Jaunaren eskuan,
errege-burestun zure Jainkoaren eskuan.

Ez deutsue barriz deituko «Itzia»,
     ez eta zure lurraldeari ere «Hondamendia».
     «Neure atsegina» deituko deutsue zuri,
     eta «Senarduna», zure lurraldeari.
     Atsegin izango dau-ta zugan Jaunak,
     eta senarduna izango da zure lurraldea.

Mutil gaztea neskatileagaz ezkontzen dan lez,
     zure eraikilea zeugaz ezkonduko da;
     Senarrak emazteagaz hartzen dauan poza,
     zeugaz hartuko dau zure Jainkoak.

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant. Osasun eta garaipen-estalkiz jantzi nau Jaunak.

3 Ant. Goretsiko dot Jauna bizi nazan artean.

145 Salmoa

Goretsi eizu Jauna, ene barrua,
goretsiko dot Jauna bizi nazan artean,
eresi egingo deutsat Jainkoari ni nazan artean.

Itxaropenik ez ipini nagusiengan,
     salbamenik ez dakarren gizonagan.
     Arnasa galtzean hauts bihurtuko da,
     orduan desegingo dira haren asmoak.

Bai dohatsu, Jakoben Jainkoa lagun dauana,
     Jaunagan, bere Jainkoagan, uste on jarri dauana.
     Bera da, zerua ta lurra,
     itsasoa eta han dagozan guztiak egin dauzana.

Leiala da betiren beti,
emoten deutse, eskubidea zapalduei,
ogia, gose diranei.

Atxilotuak Jaunak askatzen ditu,
     itsuen begiak Jaunak argitzen ditu.
     Konkor dagozanak Jaunak dauz zutunduazoten,
     zintzoak Jaunak ditu maitatzen.

Arrotzak Jaunak ditu zaintzen,
umezurtz eta alargunak laguntzen,
eta gaiztoen asmoak eragozten.

Errege izango da Jauna sekuletan,
zure Jainkoa, Sion, menderen mendeetan.

Aintza Aitari eta Semeari,
    eta Espiritu Santuari.
   Lehen lez, orain eta beti,
    eta amaibako egunetan. Amen.

Ant. Goretsiko dot Jauna bizi nazan artean.

Jainkoaren hitza

Dt 4, 39-40a

Jakin eizu, gaur, eta sinistu bihotzez, Jauna dala Jainko bakarra, goiko zeru haretan eta beheko lur honetan; ez da besterik. Eta bete eizuz, gaur emoten deutsudazan lege eta aginduak.

R/. Bedeinkatu daidan * aldi oro Jauna. Bedeinkatu.
V/. Nire ahoan beti Haren gorespena. Aldi.
Aintza Aitari. Bedeinka.

Bened. ant. Izan gaitezen Jaunaren serbitzari zintzo eta zuzen gure egun guztietan.

Ant. Izan gaitezan Jaunaren zerbitzari zintzo eta zuzen gure egun guztietan.

Eskariak
Aitaren aintzaren diztira den Kristok argitzen gaitu bere itzaz; eska dezaiogun Berari, esanez:

Aintzaren errege, entzun gaizuz.

—Bedeinkatua Zu, Jauna, gure sinismenaren iturri eta helburu zarana, * ilunpetatik argi ederrera aldatu gaituzulako.

—Itsuen begiak zabaldu, eta gorren belarriak edegi zenduzan Horrek, * emon indar gure sinismen makalari.

—Egizu, Jauna, beti zure maitasunean iraun daigula, * eta maitasun honek batasunean gorde gaizala.

—Egin gaizuz tentaldian bizkor, eta estualdietan sendo; * ondo-aldian, ostera, esker oneko.

(… isil unea, bakotxak bere eskaria egin ahal izan daian).

Gure bihotzetara isuria izan dan Jainkoaren Espirituarekin bat eginik, esan daigun:

Otoitza

Gogoratu eizu, Jauna, Zeure alkarte santua, Bildotsaren odolaz barritua; zure herriak bere hobenen parkamena jadetsi daian, eta bere salbazinoa lortu. Zure Seme Jesu Kristo gure Jaunaren bitartez, Zurekin eta Espiritu Santuarekin batean Jainko eta errege bizi da-ta, gizaldi eta gizaldietan.

Amaierea

V/. Bedeinkatu gaizala Jainko ahalguztidunak: Aitak eta Semeak eta Espiritu Santuak.
R/. Amen.

V/. Goazen Jaunaren bakean.
R/. Eskerrak Jainkoari.

IV. EGUENA

GORESPENAK

Agurra

V/. Zatozkit lagun, ene Jainko.
R/. Jauna, zatoz laster ni laguntzera.

V/. Aintza Aitari eta Semeari eta Espiritu Santuari.
Hasieran zen bezala orain eta beti
gizaldi eta gizaldietan. Amen. Aleluia.

Goratzarrea

Salterioa

1 Ant. Entzunazo niri goizean, Jauna, zure maitasuna.

142 Salmoa

Entzun, Jauna, nire otoitza,
     hartu eizu nire eskaria zure leialtasunez,
     entzun naizu zure zuzentasunez.
     Ez deitu morroi hau auzirako,

ez dago-ta gizon zintzorik zure aurrean.

Etsaia nire atzetik dabil,
     lur-jorik itzi dau nire bizia,
     ilunpetan ipini nau, aspaldi hilen antzera.
     Barruko kemena makaldu jat,
     bihotza barruan dardaratu jat.

Behinolako egunak ditut gogoan,
     zure lan guztiak hausnartzen dihardut,
     zure esku-lanak gogoemoten dihardut.
     Nire eskuok Zeugana zabaltzen dira,
     nire gogo hau, lur elkor, Zutaz egarri da.

Entzun laster ni, Jauna,
     joana dot-eta arnasa.
     Ez ezkutatu niri zure aurpegia,
     izan ez nadin herio-lezara jausiak lez.

Entzunazo niri goizean zure maitasuna,
     Zeugan dot-eta itxaropena.
     Adierazo eidazu hartu behar dodan bidea,
     Zeugana dot-eta jasoa bihotza.

Atara naizu, Jauna, etsaien menpetik,
     Zeugana nator-eta igesi.
     Zuk nahia egiten erakutsi eidazu,
     nere Jainkoa Zeu zaitut-eta.
     Zure arnasea ona da,
     zabaldira atara naiala.

Zure izenagaitik, Jauna, nire bizia zaindu,
zure zuzentasunez larrialditik atara naizu.

Aintza Aitari eta Semeari
     eta Espiritu Santuari.
     Lehen lez, orain eta beti,
     gizaldi eta gizaldietan. Amen.

Ant. Entzunazo niri goizean, Jauna, zure maitasuna.

2 Ant. Ibaia bezela ixuriko dau Jaunak bakea Jerusalemen ganera.

Kantika: Is 66, 10-14a

Poztu zaiteze Jerusalemegaz,
     maite dozuen guztiok, egin jai haregaz;
     alaitu eta poztu haregaz,
     dolu egin zenduenak haregaitik.
     Asetzeraino edoskiko dozue-ta haren bularren gozoa,
     atseginez xurgatuko, haren bularren oparoa.

Holantxe egin dau berba Jaunak:
ibaia lez isuriko dot haren ganera bakea,
eta ganezka doan ibaia lez, herrien ondasuna.

Haren umeak besoetan eroango dabez,
     belaunetan maiteki hartuko dabez.
Amak bere umea gozatzen dauan lez,
     halantxe zaituet Nik gozatuko,
     eta zuen gozamena Jerusalemen dozue izango.

Poztuko da zuen bihotza hori ikustean,
loratuko dira zuen hazurrak bedartza baten antzean.

Aintza Aitari eta Semeari
     eta Espiritu Santuari.
     Lehen lez, orain eta beti,
     gizaldi eta gizaldietan. Amen.

Ant. Ibaia bezela ixuriko dau Jaunak bakea Jerusalemen ganera.

3 Ant. Gozoa da, gure Jainkoari dagokion gorespena emotea.

146 Salmoa

Goretsi eizue Jauna,
ona da-ta gure Jainkoari eresi egitea,
gozoa, Hari dagokion gorespena emotea.

Jerusalem Jaunak eraikitzen dau,
     Israeldik banatuak batzen ditu.
     Bihotz-urratuak Berak osatzen,
     eta hareen zauriak lotzen.

Izarrak bat-banaka ditu zenbatzen,
     bakotxa bere izenez izendatzen.
     Handi da gure Jainkoa, indarrez indartsu,
     Harek dakienak neurririk ez dau.
     Jaunak umilak altxatzen ditu,
     gaiztoak lurrera jaurtitzen ditu.

Kantatu eiozue eskerrak emonez Jaunari,
     kitaraz egin eresi gure Jainkoari.
     Berak estaltzen dau-ta hodeiez ortzia,
     emoten deutso lurrari euria.

Harek larrea ataratzen dau mendietan,
     gizakiarentzako landarea.
     Berak emoten deutse jana abereei,
     eske jagokozan belakumeei.

Ez dau aintzat hartzen zaldiaren indarra,
     ez dau gogoko giza-belaunaren azkarra.
     Gogoko ditu Jaunak bildur deutsoenak,
     Haren ontasunean itxaron dabenak.

Aintza Aitari eta Semeari
     eta Espiritu Santuari.
     Lehen lez, orain eta beti,
     gizaldi eta gizaldietan. Amen.

Ant. Gozoa da, gure Jainkoari dagokion gorespena emotea.

Jainkoaren hitza

Erm 8, 18-21

Oraingo neke-lanak ezer gitxi dira, gero gugan azalduko dan aintzaren aldean. Izadia bera ere zain-zain dago, Jaungoikoaren seme-alaben agerkunde betea itxaroten. Hutsaren menpeko eginadago-ta; ez, ordea, bere nahiez, menperatu eban hagaitik baino. Baina, beti be, izadiak berak badau itxaropen, ustelkeriaren morrontzatik urten, eta Jaungoikoaren seme-alaben aintzazko askatasunera helduko dala.

R/. Gauean, Jauna, * Zeu gogoemoten zaitut. Gauean.
V/. Zeu bihurrtu zara-ta nire laguntzailea. Zeu.
Aintza Aitari. Gauean.

Bened. ant. Erakutsi, Jauna, zure herriari salbazinoa, eta parkatu gure pekatuak.

Ant. Erakutsi, Jauna, zure herriari salbazinoa, eta parkatu gure pekatuak.

Eskariak
Jainkoagandik jatorko bere herriari salbazinoa; egin deiogun autormen, esanez:

Zeu zara, Jauna, gure bizia.

—Bedeinkatua Zu, Jainko, Jesu Kristo gure Jaunaren Aita, Zuk, zeure erruki handiz itxaropen berrira sortu gaituzulako, * zure Semearen biztuerearen bitartez.

—Zure antzera egindako gizakia Kristogan barritu dozu: * egin gaizuz zeure Semearen irudiko.

—Isuri, Jauna, zure Maitasun-Espiritua, * gorrotoz eta bekaizkeriaz hondatuta dagozan gure bihotzetara.

—Emoiezu gaur lana, lanik barik dagozanei, ogia gose diranei, poza nahigabetuei; * eta guztiei, grazia eta salbazinoa.

(… isil unea, bakotxak bere eskaria egin ahal izan daian).

Jesusi esker, Jainkoaren seme-alaba eginak izan gara; horregaitik, bildur barik esan daigun:

Otoitza
Emoiguzu, Jauna, salbazinoaren ezaguera argia; gure arerioen eskuetatik atarata, bildur barik, zintzo eta zuzen zerbitu zaiguzan, gure egun guztietan. Zure Seme Jesu Kristo gure Jaunaren bitartez, Zurekin eta Espiritu Santuarekin batean Jainko eta errege bizi da-ta, gizaldi eta gizaldietan.

Amaierea

V/. Bedeinkatu gaizala Jainko ahalguztidunak: Aitak eta Semeak eta Espiritu Santuak.
R/. Amen.

V/. Goazen Jaunaren bakean.
R/. Eskerrak Jainkoari.

IV. Barikua

GORESPENAK

Agurra

V/. Zatozkit lagun, ene Jainko.
R/. Jauna, zatoz laster ni laguntzera.

V/. Aintza Aitari eta Semeari eta Espiritu Santuari.
Hasieran zen bezala orain eta beti
gizaldi eta gizaldietan. Amen. Aleluia.

Goratzarrea

Salterioa

1 Ant. Bihotz garbi bat, Jainko, sortu eizu nigan, arnasa bizkorra barritu eizu nire barruan.

50 Salmoa

Erruki zakidaz, Jainko, dozun maitasun handiaz,
      suntsitu eizu nire makurra zure amaigabeko errukiaz.
      Garbitu naizu zehatz nire hobenetik,
      ikuzi naizu nire gaiztakeriatik.

Nire bihurrikeria ezagutzen dot-eta,
      nire hobena beti dot-eta begien aurrean.
      Zeuri egin deutsut pekatu, Zeuri baino ez,
      zure begietan oker dana egin dot nik.

Zuzen agertuko zara auzian,
      zintzo zure epaian.
      Hobendun sortua naz izan ere,
      pekatuan ninduan amak erne.

Zuri, ostera, bihotz leiala atsegin jatzu,
      bihotz-munean zuhurtasuna irakasten deustazu.
      Busti naizu isipuz, eta garbi geldituko naz,
      ikuzi naizu, eta edurra baino zuriago geldituko naz.

Entzunazo poza ta atsegina niri;
      xehatu dozuzan hazurrok egin beie jauzi.
      Aurpegi hori nire hobenetatik alderatu eizu,
      nire makurkeria guztiak suntsitu eizuz.

Bihotz garbi bat, Jainko, sortu eizu nigan,
      arnasa bizkorra barritu eizu nire barruan.
      Ez naizu urrundu zure aurretik,
      zure arnasa santua ez kendu niri.

Zure salbamenaren poza bihurtu eidazu,
      zure arnasa zabalez sendotu naizu.
      Erakutsiko deutsedaz gaiztoei zure bideak,
      Zeugana bihurtuko dira pekatariak.

Atara ni odol-zigorpetik, Jainko,
      Jainko, ene salbatzaile;
      eta nire ezpanek zure zuzentasuna
      pozetan zabalduko dabe.

Edegiko deustazuz ezpanok, Jauna,
      eta nire ahoak iragarriko dau zure gorespena.
      Ez jatzu-ta atsegin oparirik,
      erre-opariak ez zeunkez hartuko, nik emonik.

Nire oparia, Jainko, bihotz damutua:
ez dozu arbuiatuko, Jainko,
bihotz damutu eta umildua.

Agertu zaitez, Jauna, onbera Sionekin,
      Jerusalemgo harresiak egin eizuz barri.
      Orduan onartuko dozuz
      legezko opari, emari eta erre-opariak;
      orduan izango dira zekorrak zure altaran eskeiniak.

Aintza Aitari eta Semeari,
      eta Espiritu Santuari.
      Lehen lez, orain eta beti,
      eta amaibako egunetan. Amen.

Ant. Bihotz garbi bat, Jainko, sortu eizu nigan, arnasa bizkorra barritu eizu nire barruan.

2 Ant. Poztu eta alaitu zaitez, Jerusalem, zeugan alkartuko dira-ta herri guztiak.

Kantika: Tob 13, 10-15. 17-19

Bedeinkatu eizue Jauna, Haren aukeratuak,
abestu Jerusalemen Haren goralpenak.

Jerusalem, Jainkoaren uri,
zigortu zaitu Jaunak zure seme-alaben eginakaitik,
baina herri zintzoarentzat izango dau barriro erruki.

Goretsi eizue Jauna, dagokionez,
     eta bedeinkatu gizaldietako erregea,
     barriz ere pozez, zeugan eregi dadin Haren jauretxea;
     atxilotu guztiak zeugan alaitu daizan,
     dohakabe guztiak, gizaldiz gizaldi, zeugan maitatu daizan.

Argi bizi batek argituko ditu lurreko bazter guztiak;
     herri asko etorriko jatzuz urrundik;
     lurreko bazter guztietatik etorriko dira
     zure izen santuaren bizilekura,
     zeruko erregeari esku-erakutsiak ekartzera.

Gizaldiz gizaldi pozetan egongo dira zugan,
uri hautatuaren izenak iraungo dau betieran.

Poztu eta alaitu zaitez zintzoen seme-alabakaitik,
danak batuko dira-ta zeugan,
eta bedeinkatuko dabe gizaldien Jauna.

Dohatsu, zu maitatzen zaituenak,
dohatsu, zure bakeaz poztutzen diranak.

Ene arima, bedeinkatu eizu Jauna, errege handia,
Jerusalem berreregia izango da-ta,
gizaldi guztietarako Haren bizilekua.

Aintza Aitari eta Semeari,
      eta Espiritu Santuari.
      Lehen lez, orain eta beti,
      eta amaibako egunetan. Amen.

Ant. Poztu eta alaitu zaitez, Jerusalem, zeugan alkartuko dira-ta herri guztiak.

3 Ant. Sion, goretsi eizu zure Jainkoa, bere mintzoa bialtzen dau-ta lurrera.

147 Salmoa

Jerusalem, ospatu eizu Jauna,
     Sion, goretsi eizu zure Jainkoa.
     Zure ateen sarrailak indartu ditu-ta,
     zure seme-alabak zeure barruan bedeinkatu ditu.
     Zure mugetan bakea ezarri dau-ta,
     gari-maminez asetu zaitu.

Bialtzen dau lurrera bere berbaldia,
     eta Haren berbea bizkor eta arin doa.
     Emoten dau edurra artulea lez,
     zabaltzen dau aintziarra hautsa lez.

Ogi-apurraren antzera jaurtitzen dau bere izotza:
     Nork jasan daike haren hotza?
     Bialtzen dau bere hitza, eta harekin urtu egiten dira,
     bere haizeari eraginez urak isurika doaz.

Iragarri deutso bere hitza Jakobi,
     bere erabagi eta aginduak Israeli.
     Ez deutso egin holakorik beste herriri,
     bere aginduak ez deutsoz agertu beste inori.

Aintza Aitari eta Semeari,
      eta Espiritu Santuari.
      Lehen lez, orain eta beti,
      eta amaibako egunetan. Amen.

Ant. Sion, goretsi eizu zure Jainkoa, bere mintzoa bialtzen dau-ta lurrera.

Jainkoaren hitza

Ga 2, 19b-20

Kristorekin kurutzean josita nago; bizi naz; ez ni, baina; Kristo bizi da nigan. Oraingo gorputzean bizi nazala, Jainkoaren Semeagan dodan sinismenetik bizi naz, bere bizia neuretzat emoteraino maitatu nau-ta.

R/. Oihu dagiot Goi-goiko Jainkoari, * on egiten deustan Jainkoari. Oihu.
V/. Bialdu deidala zerutik salbamena. On egiten.
Aintza Aitari. Oihu.

Bened. ant. Gure Jainkoaren errai errukitsuekaitik, agertuko jaku Goiz-eguzkia ganeetatik.

Ant. Gure Jainkoaren errai errukitsuekaitik, agertuko jaku Goiz-eguzkia ganeetatik.

Eskariak
Jainkoak, Berak egin eta bere Semearen odolaz ber-erositako guztien ardura handia dauka; hotsegin deiogun, beraz, uste osoz esanez:

Sendotu, Jauna, gugan egin dozuna.

—Jainko errukitsu, eroan gaizuz egiazko santutasunaren bideetatik, * on, zuzen eta maitagarri dana bilatu daigun.

—Zure izenaren maitasunagaitik, ez gu itzi betiko, * eta ez urratu gugaz egindako zure alkartea.

—Begitu, Jauna, gure bihotz damutuari eta espiritu apalari, eta onartu gaizuz, * Zugan itxaron dauanik ez dozu-ta galduko.

Kristogaz batean, profeta izatera deitu gaituzun Horrek, * egizu, mundu guztian zabaldu daiguzala zure miragarriak.

(… isil unea, bakotxak bere eskaria egin ahal izan daian).

Hurreratu gaitezan Aitagana, eta esan deiogun Jaunak berak irakatsi euskun otoitza:

Otoitza
Emoiguzu, Jauna, zure grazia ugaria, zure aginduen bidetatik ibiliz, lortu daigun mundu honetako bakea eta besteko atsedena. Zure Seme Jesu Kristo gure Jaunaren bitartez, Zurekin eta Espiritu Santuarekin batean Jainko eta errege bizi da-ta, gizaldi eta gizaldietan.

Amaierea

V/. Bedeinkatu gaizala Jainko ahalguztidunak: Aitak eta Semeak eta Espiritu Santuak.
R/. Amen.

V/. Goazen Jaunaren bakean.
R/. Eskerrak Jainkoari.

IV. Zapatua

GORESPENAK

Agurra

V/. Zatozkit lagun, ene Jainko.
R/. Jauna, zatoz laster ni laguntzera.

V/. Aintza Aitari eta Semeari eta Espiritu Santuari.
Hasieran zen bezala orain eta beti
gizaldi eta gizaldietan. Amen. Aleluia.

Goratzarrea

Salterioa

1 Ant. On da zure izenari, Goi-goiko, eresi egitea, eta goizean zure maitasuna iragartzea.

91 Salmoa

On da Jaunari eskerrak emotea,
     eta zure izenari, Goi-goiko, eresi egitea;
     goizean iragartzea zure maitasuna,
     eta gauez zure leialtasuna;
     hamar hariko salterio eta lirarekin,
     kantuz eta kitararekin.

Zuk eginek, Jauna, atseginez betetzen nabe,
     zure esku-lanek pozetan nauke.
     Bai handi, Jauna, Zuk egindakoak,
     bai sakon dirala zure asmoak!

Ez ditu sumatzen buru bakoak,
     ez ulertzen zentzun bakoak.
     Gaiztoak bedarra lez hazten badira be,
     eta gaizkile guztiak loratzen,
     betiko hondamendia izango dabe azken.

Jauna, Zu, ostera,
     betien-beti garai zara.
     Hara, zure etsaiak, Jauna,
     hara, zure etsaiak galdu egingo dira,
     gaizkileak sakabanatu egingo dira.

Baina niri basa-idiaren indarra emon deustazu,
     orio oso garbiz gantzutu nozu.
     Nire etsaiak lotsaturik ikusi dodaz,
     nire aurka jagi diran  gaiztoen hondamena entzun dot:

«Zintzoa palmondoa lez loratuko da,
     Libango izaia lez haziko da;
     Jaunaren etxean landatua,
     gure Jainkoaren atarietan loratua.

Emongo dabe uzta zahartzaroan be,
     mardul eta gordin egongo dira.
     Iragarriko dabe ze zuzena dan Jauna,
     nire Harkatxa, Beragan gaiztakeriarik ez daukana».

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant. On da zure izenari, Goi-goiko, eresi egitea, eta goizean zure maitasuna iragartzea.

2 Ant. Bihotz barria emongo deutsuet, eta barruan arnasa barria ezarriko.

Kantika: Ez 36, 24-28

Neuk hartuko zaituet atzerrietatik,
lur guztietatik batuko,
eta zuen lurraldera ekarriko.

Ur garbiz zipriztinduko zaituet:
eta garbituko zarie zikin guztitik;
garbituko zaituet zuen sasi-jainkoetatik.

Bihotz barria deutsuet emongo,
     eta barruan arnasa barria ipiniko.
     Kenduko dot zuen soinetik harrizko bihotza,
     jarriko deutsuet haragizko bihotza.

Neure arnasea ipiniko dot zuen barruan
eta neure legebidean ibiliazoko zaituet,
nire aginduak zaindu daizuezan eta bete.

Nik zuen arbasoei emondako lurrean bizi izango zarie.
Nire herri zarie zuek izango
eta Ni zuen Jainko.

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant. Bihotz barria emongo deutsuet, eta barruan arnasa barria ezarriko.

3 Ant. Umetxoen eta sein bularrekoen ahotik, Jauna, atara dozu gorespena.

8 Salmoa

Jauna, gure Jauna,
bai miragarria zure izena, lurbira osoan!

Zeruen ganetik gora,
     zure handitasuna!
     Umetxoen eta sein bularrekoen ahotik
     atara dozu gorespena, arerioak isilduazoteko,
     etsaiak eta aurkakoak zentzuzko egiteko.

Zure atzamarren lana dan ortzia ikustean,
     han ipini dituzun ilargi-izarrak ikustean:
     Zer da gizakia, Zu haretaz oroitu zaitezan?
     Edo-ta gizakumea, Zu haretaz arduratu zaitezan?

Aingeruak baino doi-doi txikiago egin dozu,
     ospez eta aintzaz koroatu dozu.
     Zure esku-lan guztien buru ipini dozu,
     guztia oinperatu deutsazu:

Ardi eta idi guztiak,
     ganera lurreko abere guztiak;
     eguratseko hegazti eta itsasoko arrainak,
     itsas-bidexketan dabilzanak.

Jauna, gure Jauna,
bai miragarria zure izena, lurbira osoan!

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant. Umetxoen eta sein bularrekoen ahotik, Jauna, atara dozu gorespena.

Jainkoaren hitza

2 Pe 3, 13-15a

Guk, Jaunak agindutako lez, zuzentasunaren bizi leku diran zeru barriak eta lur barria itxaroten doguz. Beraz, honeek itxaroten dozuezala, senide maiteok, ahalegindu zaiteze, Jainkoak bere aurrean garbi eta errurik barik bakean aurkitu zaizen. Izan eizue gogoan, gure Jaunaren luzapena salbazinorako dala.

R/. Zuri goratzarre egitean, Jauna, * ezpanok pozik egongo dira. Zuri.
V/. Nire mihinak zure zuzentasuna autortuko dau. Ezpanok.
Aintza Aitari. Zuri.

Bened. ant. Israelgo Jainko, zuzendu gure oinok bake-bidean.

Ant. Israelgo Jainko, zuzendu gure oinok bake-bidean.

Eskariak

Egin deiogun dei Jainkoari, bere Semearen bitartez munduari bizia eta itxaropena emon deutsozalako, eta esan daigun:

Entzun gaizuz, Jauna.

—Jauna, guztion Aita, Zeuk erakarri gaituzu egun honen hasierara; * egizu, gure bizitzan Kristorekin bat egin daigula zure ospe eta aintzarako.

—Egizu, Jauna, bizi izan gaitezala beti, * Zuk, bihotzetan isuri deuskuzuzan sinismen, itxaropen eta maitasunean oinarriturik.

—Egizu, Jauna, gure begiak Zeuri begira egon daitezala beti, * zure deiari berehala erantzun deiogun.

—Atara gaizuz, gatx guztien maltzurkeria eta liluretatik, * eta babestu gaizuz pekatu guztietatik.

(… isil unea, bakotxak bere eskaria egin ahal izan daian).

Jainkoaren seme-alaba izateak emoten deuskun pozez beterik, egin daigun otoitz:

Otoitza
Jainko ahaltsu eta betikoa, argi distiratsu eta gerizpe bako eguna, agertu zakiguz zure argiagaz, eta kendu gugandik gure pekatuen iluna. Zure Seme Jesu Kristo gure Jaunaren bitartez, Zurekin eta Espiritu Santuarekin batean Jainko eta errege bizi da-ta, gizaldi eta gizaldietan.

Amaierea

V/. Bedeinkatu gaizala Jainko ahalguztidunak: Aitak eta Semeak eta Espiritu Santuak.
R/. Amen.

V/. Goazen Jaunaren bakean.
R/. Eskerrak Jainkoari.

lunes, 6 de enero de 2025

Laugarren astea

Lehenengo Domekea